Well wuohl mehrst guet küeren kann, de is de all glieks en guet Stück met hen. Ick meine hier kien Sabbeln orre süss so dumm Gepraot. So wat nich. Nä. Aower ruhig es düütlick säggen, wat Sache is, dat giff Luft. So weet jedereen, wu he dran is. Wat dann noch so klooke Germanisten sind, de kommet gar noch met Artikulation un so wat, Dat giff et jä auk noch, also düssen mündlichen Ausdruck. Un wenn wi dao all bi sind, so draff auk de rechte Betonung nich debi feihlen.

     Kien Wunner, dat Jopp sick bi et Küeren trüggehölt. Wenn de Mann üöwerhaupt wat säch, so säch he immer bloß: „Jajaja.“ Mehr nich. Dat mott et män doon. Rest moss di denken. Heel änners siene Frau, wat ne Olga uut en Kaukasus is. Weil et iähr hier bi us an sick wuohl gefööl, is se met Jopp wat anfangen. Un Jopp? De kam up düsse Art auk noch an en Wief. Wat soll Jopp all säggen: „Jajaja“. Un van Stund an dai Olga för em dat Küeren. Doch mi schinn, Jopp harre al nix mehr to säggen. Denn wenn es wat wör, Junge, dann fackelde Olga aower nich lange. Dann göng et glieks met Karacho.

     Ick sach to Jopp, he könn bi so wat nich immer bloß ducknacken.  De russischke Natur bruukte auk es wat an Wedderpart (Widerstand). Egaol so met „Jajaja“, leip he äs Jesemännken (kleines, unscheinbares Wesen). Nich dat he noch Bammel vör siene Ollske kreeg! „Du moss seihn, dat du dao nich noch eenes Dages leep (schlimm) met anlöpps“, sach ick em. Off he dat verstaohn härre? Jopp sach: „Jajaja.“ Ick will de auk nix mehr up säggen.

     Doch dann kam de Saake met Rasputin, düssen struppigen Rüern. Dat Dier lööt eens Dages den Kopp mächtig hangen. Jopp möök dat Sorgen. Doch weil de Mann nich gerne küerde un he erst recht nich lang un breet met Olga dispelteeren woll, händelnde Jopp för sick. He nöhm den Rüe an de Liene un göng de stiekum achtendör mit nao’n Veehdokter.

De nahm sick den Rüern met allerhand wunnerlicke Gerätschaften vör un mennde, „das Beste für den Rüden“ wäre nu wuohl bloß noch de Spritze. Godorri! Dao moss Jopp nu aower slucken. Herrjeh. Wat maaken nu? Un Olga? He wiesede den Dokter en Blättken met ne Telefonnummer. „Ach, Dokter“, beddelde he, et möök sick amtlicker, wenn he äs Dokter dat siene Frau Olga villicht biböög. Off he wuohl iäben anroopen dai, „ … um ihr das beizubringen?“, fröög den Veterinär. „Jajaja“, nickoppede Jopp. Dao greep den Dokter dat Telefon, stellde up Luut, so dat Jopp mithören konn un spröök: „Ach, eh, werte Frau, hier spricht Doktor Möllers. Guten Tag. Nun, eh, nicht wahr, ihr Mann ist mit Rasputin hier und ich muss sagen, er muss eingeschläfert werden. Sagen Sie, ist das in Ordnung so?“

„Ja, also!“, reip Olga un wünnerde sick, „höre richtig ich? Josseff, mein Mann, er will das?!“ Prompt höölt den Doktor Jopp den Hörer hen un Jopp reip: „Jajaja!“ „Na ja“, sach Olga, „wenn das so ist, dann nur zu. Und Rasputin, bitta schön, ja, den geben Sie dann mal kräftig Tritt in den Hintern, der findet allein schon wieder nach Haus.“

Nu in‘ Fröhjaohr kam hier es en Tropp Vogel bineene. Et schinn, se mööken alle gern den Schnabel loss, denn et gong glieks hauch her debi. Den eene reip „Piep“, den ännern „Fiep“, nu ja, wu dat iäben so is met de Vogels. So wat moss kennen, dat kanns nich studeeren. Wat man so devan metkreeg, harren se et wuohl alle nich eenfach. Ach, ach, ach, et wäre längst nich mehr so heimelig för iähr in de Welt. Wo göng üöwert Feld noch schilpend (zwitschernd) en fidelen Lewing (Lerche) in de Höchte? Wo reip munter noch de Kiewitt (Kiebitz) dör de wiede Welt? Kien Wunner, dat söwwst de Primadonna met iähre wunnerbaren Nachtegallkolleraduren mehr äs knapp bloß hier un dao noch to hören wäre. Gar Spreen (Stare) orre Distel- un Gröönfinken mööken sick rar. Auk de Gaitling (Amsel, Singdrossel) moss säggen, he härre all munterer tiriliert. Schön, dat weinßens de Gempels (Dompfaff) sick noch met Wonn üm de hauhgen Kiärktüörns dreihden. Gott to Ehr klüng iähr „Tüüh“ un „Pijüt“!

Un jüst denne, den Gempel wör et, wecke nu gesellig in de Vogelrunde fröög, off se sick an en 1. Mai nich maol tohaup en schönen Dag in‘ Stemmersken Bagno maaken sollen (das Bagno in Steinfurt war bis Anfang des 19. Jahrhunderts die bedeutendste Parkanlage Westfalens). Oh, dao wören se glieks alle för. Wo se sick denn driäppen sollen, fröög den Gaitling „Nu ja“, keek de Gempel so in de Runde un wäögede siene swatte Koppkappe hen un her, „also ick meine, naoher üm 10 vör ’t Kerkenportal in Nienkiäken. Dat is nich to fröh un nich to laate un so könn wi up ’n Weg nao Stemmert hen gar guet noch tesammen ne Runde üöwer den wietlöftigen Offlumer See bi Wiättringen dreihen. Dat wäre doch wat, orre?“ „Ganz un gar“, nickoppeden de ännern Pierpmatzen. „Also dann bis naoher üm 10 in Nienkiäken“, so den Gempel, „is jä hier glieks dichte bi“. „Jaja, kein Problem“, fleitkeden glieks wecke terügge.  

Nu mött wi Menskenkinner wietten, dat de Gempels van alle Vogels mehr äs pünktlick sind. Dat maket wuohl so de grauten Kiärktaonuhren, de se jä nu auk mehrst immerto vör Aogen häbt. Nu wör aower all baoll Veerdel 10 dör. Un kien Vogel to seihn. „Fief Minuten noch, dann dreih ick aff“, tüütede de Gempel et spitz uut. Doch dann… Wat söhg he dao? Dao kam ganz gemach, de Gaitling vöran, den Tropp Vogels up den Kerkplatz in Nienkerken dranpättket. Un alle süngen: „Nun will der Lenz uns grüßen, von Mittag weht es lau …“

Es en Torpedo schööt de Gempel hauch van’ Tüörn daale up den Gaitling hento un reip: „Ji aollen Traonsuusen, nu aower fix!“ Verschrocken anterde de Gaitling: „Tix-tix-tix. Mäck doch nix.“ „Mäck nix?“, fröög verdreiht den Gempel, „wo komm ji denn her?“ „Och“, mennde de Gaitling vergnögt, „wi häbt us dacht, düssen schönen 1. Mai könnden wi wuohl met en Maigang hen nao Nienkiäken beginnen.“

Ja, wenn dat so is, dann … nu aower män fix: „Guten Flug in de Wonnewelt“.

Wat mott, dat mott. Wat aower amtlick mott, dat mott besönners! Dao mossen gar wööste Schwertschluckers all de Waffen bi strecken. Besönners Rasputin harre dao wahn wat met to doon. Daobi konn et de Mann noch so fein met siene blitzblanken Klingen. Nich to glöwen, wat dao nich alle so dör sien Halslock göng! Scharpe Landserbajonette wören nix, de flutskeden män so dör sienen Schlund. Doch gerne gönnde de Mann sick auk es de een off ännere Kürassierfechtklinge. Un as Zugabe möök he sick söwwst vör wööste Kosakenreiterdegens nich bange. Dat Budenvolk wör de ratz bi van de Söcke – bis dat dao eens gueden Dages en Amtmann van de Berufsgenossenschaft met ne graute Aktentaske bi em stönn.

     Tschä, so un so söhg dat uut. Se wollen bloß et Beste van em. Daoto gehörde auk ne „gewisse Vorsorgemaßnahme“. Denn bi all dat scharpe Iesen, dat dao so allmänto dör siene Struotte (Kehle) göng, könnde sick up Duer licht wat debi an de Speiseröhrn affsetten. Un dann härren se em wanner all met Füfftig bi de Rente. Dat göng nich. Dao mössen se bitieten wat keegen doon. Also wör Rasputin nu alle Veerdeljaohr bi et Gesundheitsamt dran. Oh, oh, dao begöngen se em aower! Fraog nich wie. Dat wör söwwst för Rasputin kien Dümkenlecken. Doch wat mott, dat mott. Un wat amtlick mott, dat mott besönners.      

     Kopp in en Nacken, göngen se em dao „rein prophylaktisch“ met en Draohtbüörssel dört Halslock. Hölp alle nix, dao moss he män dör. Immerhin konn he aower noch met en Emmer Rapsüölge naospöölen. Dann göng et auk wanner wier. He söwwst härre sick leiwer noch iäben met en Damaszenerdolch sien Zäpfken kiddelt. Aower maak so wat es in‘ Gesundheitsamt!

     Ach, wat säch ick. Up Duer härren se sick ohnehen de heele Tortur met em sparen konnt, denn bi all de leidige Halskratzerie is Rasputin kuort drup all an Scharlach stuorben. Daomet konn auk glieks ineens „die Akte Rasputin geschlossen werden“. Amtlick wör sowiet all’s in de Riege. Söhg alle guet uut. Et bruukte jä auk för em nich es mehr „in absehbarer Zeit“ en Rentenbescheid.