Gaoh dienen Patt, di vörbestemmt;
acht‘ up de Lechter, de dao glemmt.
gaoh dienen Patt met Em.

Kiek üm di, well dao met di geiht,
et is oft licht von‘ Patt affdreiht.
Luster up de rechte Stemm.

Laup nich eenfach es ’n Schluffen;
laot auk lichthen di nich bluffen.
Staoh grade un schüü kiene Müh.

Wenn fallen bis, giff di nen Schub
un staoh met Toversicht wier up.
Kiek nich stetts nao änner Lüü.

De Lüüde weet‘ jä egaol wat,
doch off dat guet auk is apatt,
dao is de Kopp licht bi verstellt.

Kiek leiwer es maol wier nao buoben,
üm to danken un to luoben.
So wiest sick still, wat wüerklick tellt.

Dann sass et seihn, dann geiht et;
jau, mehr gar noch, dann blaiht et!
Un glieks schinnt fiener wier de Welt.

Bild: pixabay

Dien Naom‘ sie Ehre di dört ganze Liäben.
Äs Prognose häbt se di ne giäben.
He stüere di, üm to veriärwen,
Toversicht met Glück un Siägen.

Bild: pixabay

Name . . .
Up . . . Jaohre kicks nu trügge.
Bis nu auk nich mehr ganz so flügge,
so is nu aower met de Tiet
dien Hiärt daoför heel warm un wiet.

Immer wörs du för us dao;
nimmer mööks di eenfach rao‘.
Wör’t manchs auk wuohl ne Quiälerie,
Hauptsaak‘, et göng us guet debi.

Drüm will wi, so es wi hier sind,
von graute Lüe bis lütket Kind,
die Danke säggen un – nao buoben,
auk Gott daobi met Freude luoben!

Drüm sägg wi di nu es met Pfiff
(alle flöten mit Pfeifen):
Wat is et schön, dat et di giff!!!
Blief lange hier noch froh un munter!
Dann geiht de Welt so licht nich unter.

Bild: pixabay

Melodie: Der Kuckuck und der Esel

De Kattrien … fiert Geburtsdag
(Oder: Us Bäänd …, de fiert Geburtsdag)
un wi (ick) doo(t) gratteleern.
Wi sägget: Vivat, Vivat! – Un noch maol: Vivat, Vivat!
Willt schön us ameseern – nett, munter ameseern.

De Jaohre bünd verfluogen
un doch föhlt wi us jung.
Dat is gewiss nich luogen, nänä, dat is nich luogen:
Dao hät noch nix nen Sprung, wi bünd noch guet in Schwung!

Drüm nemm wi nu dat Gläsken:
Prost Kattrien … bliew gesund!
(Oder: Prost Bäänd …, bliew schön gesund!)
Wi stickt auk an nen Kääßken…,
(eine schöne Kerze wird angezündet)
nen fien Geburtsdagskääßken …
Dat hier us löcht de Stund – met Di in düsse Rund‘.

Laot‘ us nu lustig fieren
un praoten nette Tön.
Van schöne Tieten küeren – un süss an Nix us schüeren,
dat Liäben is doch schön – wat is dat Liäben schön!