Et giff genoog, üm nich to stüöhnen

Bild: pixabay

He kömmt ganz sacht, de aolle Dag;
et wätt nich biätter, ach, ach ach …
Man merkt, dat man nich all’s mehr kann
un lött an sick nich all’s mehr ran.

Un auk dat künstlicke Gebiss,
dat is män doch ’n Hindernis.
Haore wasset uut de Ohr’n
un de Geruchssinn geiht verluor’n.

De Ächtern, fröher prall un rund,
he föllt nu in dör Muskelschwund.
Un buoben up dat griese Köppken,
löpp uut de Niäs so männig Dröppken.

Dat Profil wätt langsam kläglick,
man nemmet to, nu baolle täglick.
Un auk dao drunner, unner’n Nabel,
is dat nich mehr so ganz passabel …

Stellt sick de Kopp auk noch so quer,
nutzen dött dat doch nix mehr.
Erst recht helpt nix, wenn wi bloß stüöhnt,
et hölp us mehr, wat wi noch küönnt!

Vull Aolle aower simmeleert:
Wat süss nich all’s wuohl noch passeert?!
Un statt to jamken: „Oh so ’n Schitt!“,
hölp dao nu doch es maol nen Tritt,

int Ächterpand, herrjenochmaol!
Is doch nich alles bloß egaol …
Doch bloß män so up ‚t Ääsken kliäben,
wat sall man dao denn noch beliäben?

Man mott jä nich glieks rümtospringen,
aower öfters ruutgaohn, küeren, singen
orre liäsen in guet Böök,
verdriff mit Luune männig Spöök.

Gaoh haruut off radel Rad –
un doo auk ruhig för änn’re wat!
Vull muntert up, drüm freu di mehr,
auk use Plattdüütsch helpet sehr.

Et mäck fideel, auk wenn’t maol schuert.
tesammen küern, döt immer guet.
Auk so kann man sick wuohl verwüöhnen;
et giff genoog, üm nich to stüöhnen!

Gaoht gar noch Döönkes dör de Runde,
kuemmt Quinten män so uut de Munde.
Mit Jamkerie wätt dann nich fackelt,
dann lacht wi, dat de Heide wackelt.

Mäck dat nich glieks all mehr äs risk,
mit nette Lüe bineen an‘ Disk?
Giff’t lecker auk noch wat to mümmeln,
lött lecker sick gar eenen kümmeln.

All dat giff Lecht in‘ griesen Dag,
nen armen Bloot, de dat nich mag.

♣ ♣ ♣

Fragen Sie in Ihrer Buchhandlung
nach plattdeutschen Büchern von Otto Pötter,

erschienen im Aschendorff-Verlag Münster.
Die zeitlos schönen Pötter-Bücher
zählen zu den Klassikern der plattdeutschen Sprache
und sind immer auch zu jedem Anlass
ein originelles Geschenk „von hier“!