Autor: Otto Pötter
Ick bin Otto Pötter uut Rheine. Dat lich dicht an de Grenze tüsken et Mönster- un Emsland. Et is auk ne plattdüütschke Spraakgrenze. So is dat nu maol, Platt un Platt, dat is nich immer eens. Drüm säch ick et unner us es so: Lutt use Plattdüütschk auk hier un dao immer maol wier anners, so versteiht man et von Grund her dennoch wuohl. Denn well sick mit Plattdüütschk befasset, de mott sick de auk in giebben. So is dat auk mit dat Liäsen von plattdüütschke Bööker. Man mott sick dao bloß ’n bettken mit befassen, dann geiht et.
Wat Gott dött,
dat düch alle Tiet
Melodie: Severus Gastorius (1679)
Text: Samuel Rodigast (1675)
Plattdeutscher Text: Otto Pötter (2020)
Wat Gott dött, dat düch alle Tiet,
mit Em geiht‘ guet to Werke.
Sien Siägen wirket wiet un siet,
giff Sicherheit un Stärke.
Sien Schutz un Schirm behöödet us,
bewahrt vör Angst un Plagen,
Gott wirkt dör Siene Gnaden.
Wat Gott dött, dat düch alle Tiet,
döt us gar Engel senden,
ümdat sick lichtet Zank un Striet,
so dat et guet kann enden.
Sien Schutz un Schirm behöödet us,
bewahrt vör Angst un Plagen,
Gott wirkt dör Siene Gnaden.
Hill’ge Geist,
spend mi Dien Lecht
Hill’ge Geist, spend us Dien Lecht
ümdat et wiethen löchtet
dör Wirrnis, Spöök un Schiengefecht –
un sick Dalüüricket wier höchtet.
Wirke dör un dör in us,
wi häbt et naidiger denn je,
ümdat Verlaot mehr is, statt Schmuus un Stuss,
mehr Siäligkeit, statt Ach un Weh.
Dördring de Welt mit Energie,
de et ansüss hier niärnswo giff.
Erfreue us mit Phantasie,
dann hät dat Liäben Kniff un Pfiff!
Kläöre, wat to kläören is
mit Klaorsicht düütlick uut,
ümdat daobi auk mien Gesicht
sick wieset frohgemut.
Du hill’ge Geist,
komm up us daal
Du hill’ge Geist, komm up us daal,
breng Lecht, wat düüster is un fahl.
Straohle Glanz in düsse Welt.
Komm, de us to Anmoot driff.
Komm, de Kraft un Schwung us giff,
so dat wi stattlick us hier stellt.
Komm, de Traust us giff in Naut,
de söwwst up Scherben noch wier baut,
richte up, wat daale ligg.
Help maaken us, wat better kann
un auk wat säggen, jüste dann,
wenn alles änn‘re knipp un schwigg.
Komm, de Fuck us giff, wenn ‘t mott,
de us bewahrt vör schier Verdrott,
de Been us mäck mit Kraft.
Gewe us nen klaoren Blick,
dat vöran kommt wi, Stück üm Stück –
un so den heelen End guet schafft.
Luow, Ehre Jesus Christus
Plattdeutscher Text: Otto Pötter (2020)
Luow, Ehre, Jesus Christus in alle Ewigkeit;
De Mensk för us is wuorden
uut schier Barmherzigkeit.
Hier dreeundeertig Jaohr
Gott dör Em spröök so klaor;
Luow, Ehre, Jesus Christus in alle Ewigkeit.
Luow, Ehre, Jesus Christus in alle Ewigkeit;
de vör Verdiärw woll wahren
dör Gottes Hölp un Freud.
Ümdat in use Welt
up Duer dat Guede tellt;
Luow, Ehre, Jesus Christus in alle Ewigkeit.
Luow, Ehre, Jesus Christus in alle Ewigkeit,
de us in Glanz sick wieset
derenst an‘ jüngsten Dag.
Us winket to sick hen,
int Paradies mit Em;
Luow, Ehre, Jesus Christus in alle Ewigkeit.