Männerkeramik

Bild: pixabay

Geiht et üm de Bildenden Künste, is de Keramik dao glieks vörne mit bi. Wat nu de Männerkeramik is, so is dat wier so ne Kunst för sick. Doch wat för Künste auk immer, immer willt se dao alle bi klook doon. Un dat is nich guet. Bi de Männerkeramik schon gar nich!

     Männerkeramik is eenzig wat för Mannslüe. Dat ännert auk nich de niemoodsken Genderkloos, weil, dat Inventar irritiert bloß! Un glieks is all’s all wier dörneene. Jüst dat geiht aower nich. Man denke bloß an de Speibeckens. Dao giff et kien Üöwerleggen bi. Is et sowiet, mott dat flott gaohn.  Twee stabile Griffe, un de mött‘ guet haollen. Bi ne grundsolide Männerkeramik doot se dat auk. Wat dao tellt is, Qualität dör Funktionalität. Mehr nich.

     Giff et up Damentoiletten auk noch wuohl wat an Eau de Toilette debi to, doot et bi de Herrens schlicht un eenfach auk Duftsteene. Un wenn Fraulüe dat nich geföllt, so mött‘ se män verduften. Doch dat doot se auk wier nich. Söwwst de Männerkeramik daien se an leiwsten ümkrempeln. Dat geiht sowiet, dat se us dat Miktieren noch diktieren willt.  

     Also de Fraulüe, nich wahr, dat is an sick ja nen netten Menskenslag. Aower wat kümmert de sick auk noch üm schier männlicke Eigenarten? Dat doot se aower! Se willt de Mannslüe gar noch dat Pinkeln bibrengen. Herrjeh, dao sollen wi keggen alle Anatomie auk noch bi in in de Knei’e gaohn. Unsinn! Wi Mannslüe sind nu maol äs Stehpinklers geboren. Auk wenn Fraulüe dat nich in‘ Kopp will, aower Gott woll dat so! Stringent daonao is de unverfälschte Männerkeramik.

     Nich wegtodenken debi, düsse wertigen Urinale, Marke „Niagara“. Achtung, bitte nu es scharp naodenken. Doch et schinnt, Fraulüe willt dao erst gar nich bi mitdenken. Se häbt et bloß mit dat Splentern. Drüm häbet se auk ’n Pick up de Trefferbeckens. Doch wo süss noch könn de Mann schön up ne swatte Fleige anpinkeln orre gar mit nen kräftigen Straohl nen lütken Football int Tor driäppen! Von wiägen Toilettentraining. Auk dat is för Mannslüe wier heel änners wat, äs för Fraulüe. Fraulüe laupet bi dat Training von een Hüüsken nao dat annere. So ne therapeutiske Lauperei dai de Unnerwäschke schonen. Kick, all wier nen Kniff debi. Nu denn. Sollt laupen, es se willt. Fraulüe laupet nu maol gerne

     Wi Mannslüe aower nich so gerne. Wi staoht leiwer. Gerne auk up de Toilette in Reihe un Glied. An‘ leiwsten daien wi de Hacken debi tesammensmieten. Aower immer schön „Augen geradeaus“, piel up de witte Kachelkeramik; dat rüümt glieks auk den Kopp guet up. Feihlde bloß noch, dat dao eenen von ächten her den grauten Zapfenstreich schön bi trummeln dai. Ach jao. Dann laot de Fraulüe män koppüöwer Yoga maaken. Mannslüe könnt dao wuohl ohne. Aower de Männerkeramik, nich wahr, de mott stimmen!

Plattdeutsche Bücher von Otto Pötter
aus dem Aschendorff-Verlag Münster
Immer was Schönes „von hier“