Wat de Frauenrunde in de Gemeinde wör, de daien nich bloß Koffiedrinken un süss so wat, nä, de wören in all’m so fix debi. Lestertiet dreihde sick bi iähr all’s so üm de Kultur. Göng et maol up Tour, so nannden se iähren Uutflug glieks all: „Kultuour“.

     De Mannslüe wünken de all bi aff. Se göngen et praktisker an bi so wat. Un dao wollen se sick nu nich auk noch van de Fraulüe wat säggedn laoten. Män wu dat so is, konnen de Fraulüü dat Sticheln nich laoten. Man könn doch jüst bi so nette Gemeinschaftsfahrten de Kultur nich eenfach slören laoten, meinden se. Wu et denn met ne gemeinsame Erlebnisfahrt es wör? Nä, wünken de Kerls debi aff, guet meint, aower as Kegelbrüörs leipen se nich ümsüss es de „Lustigen Buben“. Dao wollen se giän aff un an unner sick sien.

     Nu denn. Sollen de Damen sick doch in de Museen de Fööte platt laupen, de „Lustigen Buben“ föhrden leiwer met en Sambazug nao Nnorderney. Un so kümmerde sick Franz, well den Kegelvaa gaff, auk glieks maol wier üm de Platzkarten. De Fraulüü tröck et nao Bremen, in dat Völkerkundemuseum. Un so schinn et, jedereene wör de guet bi tofriär. Wat mehr?

     Wenn einer eine Reise tut, dann kann er ja nu auch was erzählen. De Fraulüe mööken mehrst ne Fraogestunde deruut. Wu et in Norderney denn wiäsen wör? Nu ja, wu Norderney iäben so wär, vull Sand un Wind. An sick immer ganz gesund dao. Wat mehr? Nu ja, dat Meer. Aower dat wör dao jä immer… Oh, dao mossen sick de „Lustigen Buben“ aower wat bi uutlachen laoten! Nein, ach nein. Dao härren de Fraulüe bi iähre Kultur aower wiet mehr beliäwt!. Se härren ja all vull seihn, aower in dat Völkerkundemuseum in Bremen wäre gar ne ägyptische Mumie wiäsen, so aolt, dat gar Moses de noch wuohl härre seihn konnt!

     Hö? Dat könn doch gar nich, wünken de Lustigen Buben aff. Franz mennde gar: „Dao laot ju män nich wat vörwies maaken. Ick wüss nich, dat Moses nu auk all in Bremen wiäsen wör.“