Putz (Polizist) Pelke moss nich mehr lange. He leip auk män bloß noch Striepe. Dat konn he noch wuohl. Wör aower richtig wat, mossen de Jüngeren ran. Bi dat Gewöhl met Schlagstöcke, Bodycam orre gar Elektroschocker wäre he söwwst unnergaohn. Doch auk dat Striepengaohn wör kien Spazeergang. Wat moss he sick dao nich manchs alle so anhören! Well häff denn vandage vör ne Uniform noch Respekt? Blief dao es immer ruhig bi. Doch äs Mann in de Jaohre wuorde Pelke met so wat wuohl feddig. He leit sick de nich bi up de Gaffel nemmen. He nich!
Nu stönn Pelke es maol wier „zwecks Verkehrsüberwachung“ an ne Ampelkrüüßung. Et duerde nich lange, dao wedihe en jungen Büül bi Ampelraut twiärs üöwer de Straote. Pelke greep nao sien Fleitepiepken, trällerde un rööp: „Halt! Absteigen!“ Stantepee sprüng dat Kerlken folgsam vant Rad Et was Meiers Hänsken, en Drielaiper (Junge in der Pupertät so von 14 – 16 Jahren), de nao en Sport woll. An sick en upgeweckt Männeken, de et auk in de Schoole recht guet konn. Nu an de Ampel aower … Egaol. Hölp jä doch alle nix mehr.
Pelke wör all bi siene Belehrung. As Polßei könn he so wat nich dörgaohn laoten. Dat bruukte en Protokoll. Also göng et in de Befragung: „Name bitte.“ Ardig anterde den Delinquenten: „Hans Meier.“ Oh, dao keek Pelke nu aower opsternäösk (aufgebracht) bi up. „Dat ick nich lache“, reip he un keek de män wat gefäöhrlick bi uut. „Glaube er ja nicht, er könne mich zum Narren halten!“ sagg he streng. „Ich frage nur einmal noch. Den Namen bitte.“ Dat wuorde Hänsken dao nu aower doch to dumm. „Also gut“, sagg he, „ich heiße Friedrich von Schiller und bin auf dem Weg in Wallensteins Lager.“
„Na bitte, geht doch“, nickoppede den Wachtmester, „warum nich gleich so? Glaube keiner, er könne mir was vorweismachen.“ Dann sagg he aower auk all wat truulicker: „Jungejunge, als Pfadfinder auf dem Weg ins Lager aber wenigstens mit Halstuch!“ Un dann kam noch wat van wiägen „jeden Tag eine gute Tat“. Bi en Pfadfinder woll Pelke denn auk es en Aoge tokniepen.
Schön so. Nu denn: „Gut Pfad!“
Pötterplatt is immer wat!
Daovan gifft in jeden Bookladen wat.
