Also dat härr ick nich dacht. Von wiägen Datenschutz. Mann, dat ick nich lache! Klärchen aower wünk aff. Ick trööf se up ’n Markt. Dao bleef se bi mi staohn. Dat moss se auk naidig, mit iähre Kerkenattrose (Kniebechwerden). Glieks sagg se mi up ’n Kopp hento, dat ick wuohl nich genoog biäden dai. Hö? Klärchen bleef stur. Ick soll män nich so dumm kieken, miene geistlicke Struktur wör offensichtlick. Dao könn ick gar nich keggen lamentern. Ohne biäden göngen de Lüe immer mehr in de Breede. Statt to iätten sollen se leiwer biäden! So eenfach wör dat. Alle düsse Ätkinsdiäten un so, dat wör wegschmietten Geld. Flieitg biäden, dat hölp auk glieks sparern. Dann härren se auk alle mehr Geld. Oha, nu auk dat noch! Egaol. Dat mit dat Biäden göng mi nich uut ’n Kopp. Et is dütt Gebet debi heruutkommen:

Gebet keggen de Korpulenz

Von Otto Pötter

O Gott, mit miene Korpulenz
liäw icke keggen alle Trends.
Ick wünske mi von Hiärten sehr,
dat endlicks ick wat lichter wör.

Drüm möcht ick nu, statt wat to iätten,
to Di in de Tiet leiwer biädden.
Dat wör nich geistig bloß gesund,
et göng auk quiet glieks Pund üm Pund.

Ick könn so ohne Strategien
lichthen insparen Kalorien.
Dat möök mi schlank un mehr äs blij,
so help mi, dör Gebet debi.

Ick will et reinheruut benennen:
Gott, staoh mi bi, üm afftonemmen!
Ick huop up Di un bitte Di,
Gott, stärk un unnerstütze mi.