Wat guet du kanns, dat maak –
dat ann’re doch, dat laot gewähren.
Sie, wat du döss, ganz bi de Saak,
ansüss kanns nix veriärwen
un kömms gar knöttrig noch an‘ Stiärwen!

De Demokratie, de is so lenkt,
dat alle häbt Chancen, off Wief orre Mann.
Un jeder kann säggen, wat he so denkt –
auk wenn he gar nich denken kann.

Bünd CDU-Lüe gar muorns all verdreiht,
dann weet Gott, wat dao süss noch so blaiht.
Man döt se an besten uut ’n Weg dann gaohn;
denn se bünd dr met‘ linke Been gar upstaohn.

De, wecker met jedet Vüögelken fleit‘,
de kuemmet daobi nich immer guet rund.
Un de, de bloß för de Katte arbeit‘,
de kuemmet dao gar noch bi up ’n Hund…

Bild: pixabay

Use Gertken kömmt noch graut haruut,
dao krieg wi noch Gefallen an,
de schütt jä män so uut sick ruut –
dat werd gar noch ’n Twee-Meter-Mann.