Use Mien wiest, wat wi denkt –
use Worde, wu wi ‘t lenkt.

Worde maakt lustig orre auk butt.
Hier giff et Lachen, dao bar Verdrott.
Maakt munter se hier, maakt dao se schachmatt;
hier blaiht Gelingen, dao süht man schwatt.

Worde maakt kriägel, nich minner auk mall.
Hier maakt se sinnig, dao gifft nen Knall.
Eener döt luoben, de annere blafft;
hier geiht’ to Werke, dao feihlt’ an Kraft.

Worde sind Gaben, riewe off minn.
Hier giff et Ernte, dao kien Gewinn.
Eener mäck’t schön, de ann’re kaputt;
hier wiest sick Freude, dao geiht se futt.

Worde schafft Welten, orre se engt.
Hier gifft Visionen, dao bloß wat kränkt.
Een’ge brengt Luune, annere muult;
hier schinnt de Sönne, dao plärr‘t un huult‘.

Wäöge Worde – süss swieg still.
Kiek auk daohen, well wat wuohl will.
Bloß fröndlick geiht‘, wu t steiht off fällt,
süss wäd nix nich uut use Welt.

Use Mien wiest, wat wi denkt –
use Worde, wu wi ‘t lenkt.