Henwollt harren se dao eenlicks nich, Grete un Bäänd. Bi so Aollenkaffees puchet sick de Omas un Opas jä doch bloß alle wat terechte, wu jung se sick noch föhlden un wu se et alle noch könnden. Aower de Runzeln leiten sick män nich wegpudern. Un bi de ollen Kerls lüllde et manchs män so uut en Baort. Et is nu maol nich to verkennen: „Wenn die Zeit wohl ist gekommen, hält auch nichts sie denn noch auf.“ Drüm konnen Grete un Bäänd Kaffeedrinken iämso guet inhuuse, ohne sick de glieks bi wiesen to mössen.    

     Aower dütmaol wör et lück änners. Pastor Schmees woll an düssen Naomeddag int Pfarrheim siene schönsten Fotos präsenteern. Thema: Von den Wellen zu den Gipfeln. Den Geistlicken knipste nu maol för sien Liäben gern. Bi em kam nao et Krüüß glieks den Fotoappraot. Drüm schinn et dao dütmaol en interessanten Naomeddag to werden. Kick, un so mööken auk Bäänd un Grete sick maol wier up en Patt dehen.

     Oh ja, wat harr de Mann nich auk all all’s so seihn! Bäänd wüss dao wuohl wat up to säggen: „Feihlt et an ne nette Frau, mott et ännerswo män wat an Afflenkung sien.“ Mann, he soll doch leiwer an sick haollen, keek Grete em wehrig an. Wat de Lüe bi dat Gequak wuohl sollen denken? De Saol was jä rappelvull. Wu licht konn sick dao eenen wat bi upschnappen. Hä nä, Grete moss doch nu immer schön uppassen, dat et met Bäänd de nich dörgöng. Nu ja. As et an en End was met de Belderkiekerie, applodeerden se sick Blaosen in de Hande. Bäänd trummelde up en Disk debi rüm.

     Glieks rutskeden de Stöhl män so hen un her, dat Geschirr klapperde, Kaffee dampde un junge Deerns leipen met Appelkooken. Et wör män een Gewusel. Bäänd wör dat tovull. He schööf sienen Stohl up de Sieten un göng nao en Kloo hen. – Oh, wat wör dat? Niäben de Düörn in de Ecke stönn noch dat graute Gestell fört Kaspertheoter. Bäänd merkde, dat se em naokeeken. Dao sollen se sick nu es wünnern. Timpen un Wogen harren se nu jä noog seihn. Drüm tratt he achter den Kasten, stöck den Kopp dör den Vörhang, möök den Kasper und fröög luuthals heel geck: „Naaa?! Seid ihr auch alle da?“

     Jö! Dat schinn jä noch spassig to werden. Alle Omas un Opas reipen: „Jaaaa!“ „Schön, schön“, sää Bäänd, „aower nich mehr lange!“ Sodann tröck he dat Gardienken to un dreihde upt Hüüsken an.