Nen ärgerlicken Aobend

Bild: pixabay

Hilde un Heini sitt‘ tesammen vör ’n Fernseher. Sport. Wenn Sport is, dött Hilde häkeln. Heini is dann …  Ja, wat is eenlicks mit Heini noch? „Heini, merks du eenlicks, dat ick de auk noch bin?“, fröög se em. „Ja sicher, aower nu is jüst Elfmeter“, kreeg se to hören. Könnden wi denn nich auk es, statt Sport, maol wier schön tesammen nen Liebesfilm kieken? „Jaaa!!“, sprüng Heini up. He meinde aower dat Tor.

     Aobende drup harren de beiden sick nu doch es den Film uutsocht: „Wie beim ersten Mal“. Schauspielers könnnt de wuohl wat von. Se dröfft aower nich pingelig sien. Se sprüngen dao auk glieks bi int Heu. Hilde räkelde sick auk all upt Sofa, as et up eenmaol „Peng“ möök. Herrjeh, jüst wenn et … Ach, is ja auk egaol.

     „Schinnt kaputt to sien, den Kasten“, brummde Heini un haude mit de Fuust an den Fernseher herüm. Aower nix. Kien Ton, kien Beld, schier gar nix. „Dat moss ja so kommen“, sprüng Hilde up un schinn lück verdreiht. „Ja Frau, ick weet, et is män nen ärgerlicken Aobend. Aower ick kann de doch auk nich an doon“, muulde de Mann. So moderne Geräte härren immer nu maol iähre Nücken. Wo dat Telefonbook denn wör, he woll auk glieks wuohl den Elektromester … Nix dao. Up so nen Aobend nu auk noch nen Elektromester debi, dat woll se nu ganz un gar nich, sagg Hilde. Üöwerhaupt härre se sick den Aobend änners vörstellt.

     Se soll et doch nich glieks so angaohn, muulde Heini, aower dao göng et män nich immer nao. Meinee, nen kaputten Aobend, dat wör doch nu nich de Welt. Dann göng he iäben an den Computer. Dao wör nu jä noch wuohl schön Tiet för. Un villicht wüörd Hilde gar mit iähr Häkeln feddig vanaobend. Also, wat mehr?

     Dann könn se sick glieks noch de Wäöske vörnemmen un büegeln, kreeg he kuortaff to hören. Oh, oh, dat hörde sick nich guet an. „Mientwiägen könnt wi auk änners wat maaken“, lenkte Heini in. Dao schinn wat dran to sien.

     Hilde kam sacht up em to un schnurrde, dat se villicht nu es tesammen wat liäsen können un dann schön …“ „Liäsen, schlaop ick forts bi in“, wehrde Heini aff. Se wüss dao wuohl wat kieggen, stupste Hilde em sacht up de Niäs un suusede em int Ohr: „Wat meins, wat härren de beiden dao iäben int Heu nich noch gerne wuohl maaket?“ „Dat weet ick doch nich?“, keek Heini iähr graut an, „de Apparat is doch kaputt gaohn!“