Plattdüütschk, dat is mehr äs schön.
Dao schüürt sick nich dat Hiärt bi wund.
Ganz anners äs so Wortgedröhn,
mäck mollig Platt de Siäl gesund.

Us Plattdüütschk is so warm, so riek,
et hät de schönsten Wäört för us.
Met jede Spraok steiht Platt sick liek –
un dat ohn Falsk un ohne Stuss.

Met Platt lött fien et sick nett ulken.
Auk butt lött derbe sick wat säggen.
Doch drägg dat Platt us auk up Wulken
un kann in Moll ümt Hiärt sick leggen.

Dann klingt et mollig, deftig, sacht.
Un sinnig is et us tomoot,
as harren Engelkes wat bracht –
män nich met Flittkes, still, to Foot.

Dat Herdfüer knackt. Lutt dao wat druut?
Wi kiekt un hört – nen Kloss, de singt.
Ansüss so nix; bloß still, nich luut,
is dao auk wat, wat in us schwingt…

Et klingt wat nao, wat lange wör,
as woll et us maol wier wat säggen.
Un mollig geiht us fien wat dör
un döt de Siäl us sachte wäggen.

Et weiget us, wat dao so klingt.
Wi föhlt us licht, behaglick, froh.
As wenn van wieden us wat winkt,
kömmt wunnerbar wat up us to…

Ja, Hiärt un Siäl werd mollig warm,
kömmt Platt in Moll statt Dur deher.
dann is ‚t, as nöhm et us in‘ Arm –
man will dann gar nix änners mehr.

♣ ♣ ♣

Siehe auch die Bücher von Otto Pötter im Aschendorff Verlag Münster erschienenen Bücher

• Liekuut, liekan
• Bömmskes & Bömmelkes
• Notizen von Fietsen un Miezen
• Hackemaih
• Kalennerblättkes

Ein schönes Geschenk für sich selbst und andere sind die Hörbuch-CD’s mit je 80 Min. Spieldauer:
Liekuut, liekan dört Jaohr sowie die CD: So is se, use Art

12 nette plattdüütschke Döönkes – alltiets plaseerlick to lustern.

Ein Anruf genügt: Copy-Shop Rheine, Tel.: 0 59 71 – 40 54 15 (Mont. – Freit. von 10 – 12 u. 15 – 17 Uhr)