Manöver

Bild: pixabay

Lessen Dage kreeg ick maol wier richtig wat up de Ohren, as so bollerige Militärfleigers üöwer mi wegdönnerden. Jesses, as wenn de Welt vergöng! Wör Rheine auk vör Tieten lange Jaohre „Standort“ mitsamt de „Starfighters“, is et mit dat Militär hier män allemaol ruhiger wuorden. De Stukas (Sturzkampfflugzeuge) doot et all lange nich mehr. Auk mit de grauten Hiärwstmanövers is et vörbi. Et spiellt buuten nich eenen mehr Räuber un Gendarm. Vandage spiellt de Offziers Angriff un Verteidigung mit de Computers. Et mäck sick nich eenen mehr schwatt debi. Fröher krööpen de Landsers noch in Kampfmontuur mit Flinten un süss so Sturmgewehre dör Wald un Flur, äs Tarnung debi noch wild Struukwerks üm de Köppe. Un aobends göng et, statt in de Kasernen terügge, int Biwak, mehrst in graute Schoppens von de Buern. Dao süngen se bi ne Pulle Beer dann mit Knecht un Gesinde: „Wilde Gesellen vom Sturmwind durchweht …“

     Bloß up de Panzers, dao harren et de Buern nich so guet up staohn. Dönnerden düsse Wööstebrakers niämlicks üöwer Land, wör alle Feldpflege för de Katte, ja, de Krume was platt. Huulde also so nen Leopard 1, smeeten de Buern de Arms in de Höchte. Bi alle Vaterlandsliebe, bleef de aower kien Steen mehr liek bi, woll man dao nich gern bi mitdoon. Doch üm de Buern noch wuohl bi Luune to haollen, gaff et dat Manöverentschädigungsamt.    

     Bäänd kann dao noch guet wat von vertellen. He was dao schließlick auk nen gueden Kunden. Well niämlicks noch wuohl gewitzt wör, konn bi so Manövers noch schöne Dalers (Geld) maaken. Bäänd dao denn auk es wier hen. He göng et glieks heel groff an: „Also so wat!! De Panzers häbt mi gistern reinweg dat heele Rööbenfeld platt maaket. Dao is nix mehr von to haalen. Ick häb mi dat maol uutriäknet; oh je, dat mäck weinßens so …“ „Entschuldigung“, göng em dat Frollein vont Amt detüsken, „aber das Manöver beginnt doch erst nächste Woche!“ „Auk guet“, leit Bäänd sick nich affwimmeln, „dann komm ick naichste Wiäke wier.“

     Kick, jüst so es de Panzers, droff man de auk nich pingelig bi sien. Dann göng et. Un so kamen se de fröher auk wuohl alle guet debi dör, bi so Manövers. Oh ja, et wören an sick schöne Tieten.