Konvertierung

Bild: pixabay

„Herrjeh Natz, wat bis du ja updreiht“, wünnerde Bruno sick, „wat is mit di?“ „Haoll di fast“, keek Natz em griepsk (forsch) an, „ick häb in‘ Lotto wunnen, sess Richt‘ge!“ „Wat du nich säggs …“, greep Bruno sick an sienen Möppel (Kinn), „is ja nich to glööwen, so wat.“ Sovull Glück up eenen Haupen, dat wär jä … Ja, he wüss gar nich, wat he daoto säggen soll. Wu man dat mit de Tall’n denn so prick up de Riege kriegen könn? Dat wär ja nu verdammt nich eenfach.

     „Och“, sägg Natz, as ick lessten Sunndag in de Marienkerke wör, dao dacht ick mi, Natz, dacht ick, du könnst et doch villicht es mit de Gesangsnummern bi’n Lotto versööken. Waorümn nich.“ „Ja aower …“, woll Bruno detüsken. „Nix aower“, wiegelde Natz aff, „dat Resultat kenns ja nu. Sess Richt’ge.“

     Also nä, so wat! Bruno kreeg sick gar nich wier in. „Wat meins“, sagg he dann, „off ick dat auk es versööken könn?“ Nu ja, waorüm nich. Schinn ja, et lööt guet tesammen (allem Anschein nach, ging das ja). „Moss immer so denken“, nickoppte Natz, „alle Bibatt batt’t (jede Hilfe nützt). All’s annere begripp sick dann von alleene.“

     Ne Wiäke drup trööfen se sick wier,

     Nieschierig fröög Natz, wu Bruno dat denn nu so gaohn wör, mit de Kerkenbookgesangsnümmerkes. Doch schinn dat nu gar nich guet, denn Bruno wünk verdreitlick aff.

     „So’n Schiet“, brabbelde he, „de Tohlen häb ke mi akkraot merkt un up dat Lottoschienkes ankrüüzet, aower nich een Gewinnnümmerken wör demit bi. Nix.“ „Also so wat“, keek nu auk Natz verstört up de Siet, „in wecke Kerke wörs du denn?“ „Hö?“, fröög Bruno terügge, „du kanns aower auk fraogen, in de Martin-Luther-Kerke. Weeß doch wuohl, ick sin nu maol evangeelschk.“

     „Ick häb et mi dacht. Ick häb mi dat glieks all dacht!“, keek Natz hiemmelwärts. „de Deibel mag et wietten woran et ligg! Dött mi ja leed för di, aower ick häb ja immer all säggt: Wenn et drupankümp häbet de Luddersken mit iähren Glauben män doch nich sovull Glück es de Kathoolsken.“

     Villicht, dat Bruno es üöwer ne Konvertierung naodächte …