Freut euch des Lebens

Bild: pixabay

Well sick bi „gewisse Anwandlungen“ es maol klook mäck, de wünnert sick, mit wat wi nich all’s so laupet, erst recht nu so in‘ Fröhjaohr. Nich ümsüss hett et ja: „Tage der Wonne schenket die Sonne“. Un dann aower: „Freut euch des Lebens!“

     Doch von nix kömmt nix. Weil wi Mensken nu maol ’n Stück Natur sind, bruukt et auk wat för de Freuden. Aower nich glieks gar so wat es Freudenhüüser, dat geiht auk billiger. Man mott bloß up de Natur wat achten, denn de reine Natur helpet us all guet debi up de Sprünge. Een Wort bloß: „Hormone“, wenn weeß, wat ick meine. Dao laupet wi alle mit, den eenen mehr, den ännern weiniger. Gar nich to glöwen, mit wat wi nich all‘s so laupet! Mit Hormone, Testosterone un Gene, samt Östrogene. Richtig nommen is et den reinsten Freudencocktail!     

     Nemm bloß es düsse Östrogene, se sind för Fraulüe wat un suorget för de „Ausgestaltung des weiblichen Körpers und eines gesteigerten Lustempfindens“. Dä! Jaja, de Fraulüe bruuket gar nich so hippelig doon, dao is vull Theater bi. Orre et feihlt iähr an düsse Östrogene. Dann is et gar in de Sektbar mit iähr wegschmietten Geld. Laupet Fraulüe aower mit guet wat an Östrogene, dann geiht et glieks in‘ Hurrah: „Alle Vögel sind schon da“. Dann moss di de Kerls dao bloß es bi bekieken!  

     Män dat kömmt bi de Kerls auk nich bloß von‘ Wind. Se häbt et manchs gewöllig mit de Testosterone to doon. Dao weet man nu von, dat et de Mannslüe to „Imponiergehabe, Kampfverhalten und Begattungsdrang“ driff. Jaja, dat kann sowiet gaohn, dat man de gar nich mehr ruhig bi sitten kann. Daobi sin wi Kerls an sick lammfromm, aower de Natur, de Natur! Wi könnt de nu maol nich vör weglaupen. Kick, un so is dat denn auk nich immer eenfach mit düsse Hormone un Testosterone un so.

     Ümso mehr hät de Kopp de wat mit to wehren. Geiht dao niämlicks de Verstand bi in de Buxe, dann Gnade Gott. Dann geiht et drunner un drüöwer. Nänä, et giff schließlik nich ümsüss dat sesste Gebott. Aower Gott Dank helpet auk hier wier Mutter Natur. Denn wenn sick dat mit de Hormone nao Jaohren uutkollert hät, maaket us de Wesseljaohre endlicks wat ruhiger.

     Ohne Folgen is dat aower auk wier nich, denn nu geiht et lück ümgekehrt. De Kerls krieget wat von de Östrogene aff, so dat se nu aobends auk all mit warme Fööte tofriär sind orre sick in’ Speigel iähre Buorst bekieket, de recht üppig in Form geiht. Tschä, un för de Fraulüe giff et nu auk es wat an Zündstoff. Reseluut könnt se endlicks es wat strenger uptrumpfen, wenn bloß muorns dat Raseeren nich wör. Doch äs netten Uutgliek krigg se von em nu den Raseerer un he van iähr den BH. Nu ja, ick sägg es so:

     Hauptsaake, et is de noch wat Spass mit bi. Un de is us doch noch wuohl gönnt, orre? Wi dröfft et bloß nich mit de Gene un Östrogene, ach ja, un auk nich mit dat Testosteron slören laoten, dann … Ja, dann kömmt de tominnst kiene Langewiele bi up.

     Kick, so is dat alle. Singen alleene döt et nich. Wi sind de sömms mit bi, wenn et hett:
    „Freut euch des Lebens!“

♣       ♣      ♣

Fragen Sie in Ihrer Buchhandlung
nach plattdeutschen Büchern von Otto Pötter,

erschienen im Aschendorff-Verlag Münster.

Die zeitlos-schönen Pötter-Bücher
zählen zu den Klassikern der plattdeutschen Sprache

und sind immer auch zu jedem Anlass
ein originelles Geschenk „von hier“!