Erotik

Bild: pixabay

„Abstand halten!“, dat was fröher de Parole tüsken Mann un Frau. Un vandage? Et geiht drunner un drüöwer. Rein dull, womit se sick vandage nich all’s so dicke doot. Von so Grenzwertiget wahrden sick de Fraulüe fröher wiet aff. Keggen lodderlick Gedoo stönn de Schaneerlichkeit. Von wiägen Sex un Erotik, nich dat wi bi so wat dumm wören, dat gleiw män nich, aower wi puchten de nich noch graut mit herüm. Vandage aower laupet de Mannslüe in de Muckibude, üm auk guet mithaollen to können un auk Susi un Lucy laot sick längst nich mehr bloß de Arms tättewieren. Doch wat säch ick? De Blaagen fanget de auk all mit an!

Klärchen keek denn auk nich schlecht, as se maol wier Besöök von iähre Enkeldochter kreeg. Klärchen will sick gar nich in Wiehrauk dreihen. Se was as junge Deern kien Kind von Traurigkeit. Aower daomaols göng et mit de Jungs noch stiekum in de Blüüsen (Busch, Wald, Dickicht). Dao bleef Natur bi Natur. Wör dat auk nich minner schön äs vandage, smeet man dao aower nich glieks so met de Rümpkes (Mieder) rüm. Dreiht et sick aower üm den rechten Josepp, säch Maria nich nää.

Klärchen hare auk wanner wuohl den rechten Josepp funnen, mit dem et an sick ganz guet klappte. Wat mehr noch alle? Un so gong se demit, mit Jopp. Tschä, dao geiht se vandage noch immer mit. Nu geiht et all baoll up de güllene Hochtiet an un iähr jüngste Enkelkind is üöwer Püppkes just heruut. Daoför glieks nu wier düsse unbequeme Fraogerie, wo Hund un Katten herkaimen un wu dat denn so göng. Herrjeh, kümp Tiet, kümp Raot. Waorüm forts so finessig? De Blaagen sind de auk all heel verrückt von, dachte Klärchen.

Jessika aower gaff nich up. Also, wu dat bi de Diers den nu so göng? Och, wünk Oma Klärchen aff, dat wäre just es bi de lütken Kinner auk, dat göng an sick ganz guet. Nix Extras. Bi iähr härre dat mit de Kinnerkes auk ganz guet klappet. Pause. Kieken. Aha. Soso. „Und die Erotik, Oma?“, fröög dat Wicht, „wie war’s bei dir denn so mit de Erotik?“ Dä. Aower Klärchen bleef ganz ruhig un sach: „Meinee Jessika, ich hab acht Kinder gekriegt. Acht! Un dao konn ick mi üm de Erotik nich auk noch graut kümmern.“


Immer was Feines von hier:
Plattdeutsche Pötter-Bücher aus dem Aschendorff Verlag Münster