Erotik

Bild: pixabay

Dao namm sick de Slagg Lüe hier fröher nix von an, von dat, womit se sick vandage nich selten alle so befasset. All’s dreiht sick üm Selbstverwirklichung, Sex un Erotik. Un alle sind se de heel wehrig von. Nix keggen so ’n bettken nette Geckerie tesammen, aower mott man sick de immer glieks blaut bi smieten? Wat sall dat, sick mit de blaute Miäse wiesen un mit de Verrichtung gar noch dickedoon?

     Nu ja, dat Mannslüe iähre Stellung wuohl an sick wichtig is, mag noch dörgaohn, aower et schinnt, bi wat Stellungen könnt et de Fraulüe all biätter! Is iähr ja auk alle gönnt. Balget se sick aower bloß drüm, well buoben bliff, geiht dat nich immer guet uut. So kriegt se sick antlest an de Köppe debi. Nix bliff von de Erotik. Antlest bliff för em de Muckibude un för iähr gau noch up ’n lessten Drücker de künstlicke Befruchtung. Ü-40-Partys villicht auk noch. Giff Secondhandshops, de häbt all Ü-60 Partys in’ Angebot. Ja, ick weeet, dat is nich immer so. Aower immer öfter.

     In dat Öller aower wör Klärchen gern up Besöök bi iähre Kinner. Klärchen häff et alle noch änners beliäwt. Nich dat Klärchen ein Kind von Traurigkeit wör, as se jung was. Dao göng et mit de Jungs auk gerne es wuohl in de Blüsen (Gestrüpp, Wald, Dickicht). Aower se smeet daobi män nich glieks so mit de Rümpkes (Mieder) herüm. Un dann harr se auk wanner up den eenen toslaon, Franz. Un nich Jans un Franz, nix Halw’s un Ganz’s.

     För Klärchen gaff et niämlicks noch so wat es Schaneerlichkeit (Schamgefühl). Doch Jutta, iähre jüngste Dochter, söhg dat tüskentiets nu auk all änners. Se mennde es maol, Mama soll sick dat mit de Geschlechtlichkeit doch nich immer so angriepen laoten (nicht so zu Herzen nehmen). Sex, dao wör doch nix ümbi. Kinners nä, aower … Aower nu wör Klärchen all Oma.

     Jessica wör schon üöwer Püppkes heruut un füng all mit so unbequeme Fraogen an. Wo Hund un Katten herkaimen un wu dat so göng. Herr des Himmels, de Blaagen sind de auk all heel verrückt von, dachte Klärchen sick. Doch dao kreeg se all wier nen Stups von Jessica. Also, wu dat denn so gong? Och, wünk Oma Klärchen aff, dat wär just es bi de lütken Kinner auk, dat göng an sick ganz guet. Nix Extras. Bi iähr härre dat mit de Kinnerkes auk ganz guet klappet.

     Pause. Kieken. Aha. Soso. „Und die Erotik, Oma?“, fröög dat Wicht, „wie war’s bei dir denn so mit de Erotik?“ Dä. Aower Klärchen bleef ganz ruhig un sagg: „Ach, Kind. Ick häb acht Kinner hat, dao konn ick mi üm de Erotik nich auk noch graut kümmern.“