As de aolle Heeremann noch Baas up de Surenburg wör (Constantin Freiherr Heereman von Zuydtwyck, 1931 – 2017), harre he dao äs Buernpräsident un Bundesjagdoberen immer maol wier hauhgen Besöök uut Wirtschaft un Poletik. Jüst bi de grauten Hiärwstjagden wören de alltiets Ministers orre süss so Prominenzen demit bi. Doch dütmaol schinn et heel uut de Wiese.

     „Godorri, wat en Böllern bi de Jagd dütmaol“, sach aolle Lüken so mehr vör sick hen, as he de Drillinge män so scheppern hörde. „Jaja“, nickoppede Hesslings Franz, „dütmaol sind auk allerhand Prominete demet bi. Se wollen ne heelmaol graute Driewjagd devan maaken. Man säch, alle müöglicken Ministers un nen heelen Dutt hauhge Regierungslüü samt noch so Präsidialbeamte wären detüsken.“

     „Wat du nich sächs“, wünnerde sick aolle Lüken, „Junge, Junge …“ „Och“, keek Hesslings Franz debi up, „häs dat met de graute Driewjagd denn nich auk in de Zeitung liäsen?“ „Jaja“, sach aolle Lüken, „dat schinn mi van Anfang an all wat wunnerlick. Wi müöget ja wuohl vull to vull Ministers un Ministerialdirigenten orre süss noch all’s so wat häm’n, aower dao nu gar Driewjagd up to maaken, dat schinnt mi män doch en bettken groff …“