Endlicks Urlaub, doch – ach, ach…
et gütt un riängt den ganzen Dag.
Glieks hät man dao de Niäse vull.
So ’n Schietwiär mäck verdreiht un dull.

Urlaubswiär draff so nich sien,
to Urlaubswiär hört Sunnenschien!
Doch krigg de Sönn et nich gedoon,
dann küert ganz anners wi devon…

Bi Fraogen wu et Wiär so wör,
wör dat up maol gar kien Mallör.
„Wi harren schier de Sönn män bloß –
et konn nich biätter, ganz famos!“

Puchet eener met dat Urlaubswiär, kanns drup an, he lügg. Dao krückt sick eener noch mehr bi terechte äs den annern. Daobi harren se vör Dagen noch den gröttsten Rochus up dat Schietwiär.

Doch giff et nu auk wier so strenge Gesundheitsapostels, de bünd dao jüst an de See ganz wild up. Denn so richtig Schietwiär, dat gäff üörnlicks wat an „maritime Reize“ un raude Bäckskes. Jaja, dat wör allemaol gesünder, äs dat Grillen in de heete Sönn. Doch well kümmert sick dao all üm?

Schietwiär hen, maritime Reize her, feihlt et an Sönne, geiht et iäben int Sonnenstudio. Orre man helpet uut de Tube guet met Tamlo nao. Tamlo mäck ja auk in‘ düüster’n Keller noch bruun. Tohuuse hett et dann. „Un dat Wiär erst! Wat harren wi doch ’n Glück mit dat Wiär! Nich to glöwen, aower alle Dage den schönsten Sunnenschien. Sönne un nochmaols Sönne!“

Schlienkamps daien nu nich minner schwindeln nao iähren Urlaub. Se wören up Baltrum wiäsen. Ganz schlimm. Riägen un nochmaols Riägen harren se dao hat. Se konnen nich nao buuten, ohne dat iähr dat Waater män so vant Gatt leip.

Hier aower mööken se de Lüe in eens män so wat van den gloinigen Lorenz (glühende Sonne) vörwies. Se flunkerden: „Bruuks nao Florida nich hen bi sovull Sönne, de wi hat häbt. Wunnerbar! Ganz wunnerbar. Van muorns bis aobends de schönste Sönne män immerto!“

Oh, dao keeken Klumps nu aower speh (misstrauisch) bi up. Also… Wu pöss dat denn bineene? Dat wören jä nu wuohl so heelmaol wunnerlicke Wetterkapriolen. Klumps wören niämlicks de glieken Dage up Norderney wiäsen. Un dao härr et bi iähr doch bloß män so guotten…

Nu ja, mennde Schlienkamp dao bloß up, Norderney, dat wör iäben nich Baltrum.