Doo wat’e kanns

Wat guet du kanns, dat maak –
dat ann’re doch, dat laot gewähren.
Sie, wat du döss, ganz bi de Saak‘;
ansüss kömms knötterig an‘ Stiärwen,
ohne gar wat to veriärwen.

Wunnertuten

„Wunner liggt nich up de Straoten.
Wunner sall man Gott üöwerlaoten.“
Dat mennde den Opa mao to dat Kind;
denn in den Wunnertuten wör nix as Wind.

Abenteuer

So Abenteuer ligget us nich,
de bünd us nich so ganz geheuer.
Wenn man auk wat to belewen krigg,
so is de Abend doch män teuer.

Minnesänger

Wenn Fraulüe sacht de Laute hört,
kuemmt se van Hiärten wahn in Schwung.
Dann giff et weinig, wat noch stört –
nich maol gar mehr nen Sietensprung…

Verduftet

„Ewig düssen Messgestank!
Heini, ick sägg di, de mäck mi noch krank.“
Dao parfümierde sick de Frau up et Kloo –
un verduftede dann eenfach so. 

Reinlick

Fraulüe giff et, de bünd mehr äs reinlick,
dat is för usereen nu all peinlick.
De haalt den Bessen gar in de Nacht,
wenn usereene bloß dreckig lacht.

Et geiht nix üöwer de Gesundheit

Gesund wör dat Suure un nich dat Sööte,
meinde Natz nao ’n derben Schluckup.
Et göng auk nix üöwer warme Fööte –
dao sett‘ he sick den Hoot up ’n Kopp…

Gröön, gröön, gröön…

Vull Gröön un Rohkost, dat hölt jung.
Dat gäff gar maol wier nie’en Schwung.
Hauptsaak se willt us nich met so ’n klook Praoten
int Gräs nu gar noch bieten laoten.

Ne Bloome för Vegetarier’s

Jüst Vegetarier’s bünd de ächterher,
ächter nen schönet, frisket Glas Beer;
weil dao niämlicks in duftend Witt
ne eenmaol fiene Bloome up sitt!

Iätterie

Well tellt un mett, wat he so ett,
de kick mehrst kruus, lück streng un hager.
Well giäne ett, de kick auk nett –
un schitt sick bleej (froh) wier mager.

Et bliff es et is

Man kann sick gar es’n Aapen freu’n
un sick vör’n Speigel knei’n un dreih’n.
Eens aower bliff doch ganz gewiss:
Dat Chatt dat bliff, dao wo et is.

Komisch

Wat man so mitkrigg, is manchs komisch:
Wenn eener praohlt, he wör katholisch
un buobendrup neuapostolisch,
so is he wuohl auk alkoholisch.

Dat Teeken van Klookheit

Nen Knecht spröök maol düt graute Wort:
„Nen Teeken van Klookheit is de Baort.“
Dao lacht‘ de Buer un reip: „Wat ’n Spook,
dann is use Sseegenbuck auk jä all klook!“

Doo wat ‚e kanns

Wat guet du kanns, dat maak –
dat ann’re doch, dat laot gewähren.
Sie, wat du döss, ganz bi de Saak‘,
ansüss kanns nix veriärwen
un kömms gar knöttrig noch an‘ Stiärwen!

Viell Wind üm Nix

Et werd mi manges heel binaut,
bi männig Lüe, so stolt un graut.
Se glänzet es nen Wiehnachtsbaom,
doch iähre Wuordeln häbt se lao´’n.

Könnig un Buer

„Adel is auk nich mehr dat, wat ‚e maol wör!“,
lööt wahn de Buer sien Organ erschallen.
Dao is em tüsken twee Buern, so ’n Mallör,
de Könnig uut de Karten ruutfallen.

Riewe (großzügig)

Wat giff nen Buer doch all’s nich so weg!
Dao verspröök es glatt de aolle Lüken:
„Wenn use Hahn es maol ’n Eiken legg,
krieg ji daovan dat erste Küken.“

So ’n Biäden düch nich

Wat wi bi ‚t Biäden mehrst so willt,
is, dat sick usen Will’n erfüllt.
Nich den van Gott, denn dat wör klook.
All’s ann’re is bloß Monolog.

Nen sicheren Posten

Knipp hier ’n Schutzmann dat Ääsken to,
bünd se in‘ Hiemmel auk glieks froh.
So Postens vergooht nu maol nie un nimmer,
denn so Schutzengelkes bruuket man immer!

♣  ♣  ♣

Siehe auch die vom Autor im Aschendorff Verlag Münster erschienenen Bücher:

• Liekuut, liekan
• Bömmskes & Bömmelkes
• Hackemaih
• Notizen von Fietsen un Miezen
• Kalennerblättkes

Empfehlenswert – auch als Geschenk – die Hörbuch-CD: So is se, use Art
und die DVD: Liekuut, liekan – dört Jaohr  

Bestellung per Anruf beim Copy-Shop Rheine, Tel.: 0 59 71 – 40 54 15
(Montag bis Freitag von 10 – 12 und 15 – 17 Uhr)